Frik Weideman – COVAX / 666 Refute

Tom Lessing (Discerning the World) says:

Hi Amelia,

Jou eie en jou man se reaksie is tipies van die hedendaagse NAR-leraars wat hoog in hulle ivoortorings sit en mense vrees probeer inboesem met hulle dreigement dat hulle nie God se gesalfdes en profete mag aanraak of kwaad aandoen nie sodat hulle nie dalk soos die rebel Theudas om die lewe gebring word nie. (1 Kronieke 16:22; Psalm 105:15). Hulle kan dus maar God se Woord verdraai, verguis en verkrag net soos hulle wil, niemand mag hulle leringe bevraagteken of aanvat nie. Dit opsigself is so onbybels soos kan kom. Ons word telkens in die Skrif beveel om alles op die proef te stel.

“Maar die geestelike mens beoordeel wel alle dinge; self egter word hy deur niemand beoordeel nie.” (1 Korintiers 2:15). Die KJV sê dit so, “But he that is spiritual judgeth all things, yet he himself is judged of no man.”

“Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid, sodat die mens van God volkome kan wees, vir elke goeie werk volkome toegerus.” (2 Timoteus 3:16-17).

“Betoon jou in alles ‘n voorbeeld van goeie werke, met onvervalstheid in die leer, waardigheid, opregtheid.” (Titus 2:7).

“Geliefdes, glo nie elke gees nie, maar stel die geeste op die proef of hulle uit God is, want baie valse profete het in die wêreld uitgegaan.” (1 Johannes 4:1).

“Maar al sou ons of ‘n engel uit die hemel julle ‘n evangelie verkondig in stryd met die wat ons julle verkondig het, laat hom ‘n vervloeking wees! Soos ons vantevore gesê het, sê ek nou ook weer: As iemand julle ‘n evangelie verkondig in stryd met die wat julle ontvang het, laat hom ‘n vervloeking wees! (Galasiërs “1:8-9).

So van vervloeking gepraat. Weet julle nie daar staan geskrywe, “Want almal wat uit die werke van die wet is, is onder die vloek; want daar is geskrywe: Vervloek is elkeen wat nie bly in alles wat geskryf is in die boek van die wet om dit te doen nie. En dat niemand deur die wet by God geregverdig word nie, is duidelik; want die regverdige sal uit die geloof lewe.” (Galasiërs 3:10-11).

“Want wie die hele wet onderhou, maar in een opsig struikel, het aan almal skuldig geword.” (Jakobus 2:10).

Let wel, Paulus wys daarop dat die wet nie net onmagtig is om te red nie maar ook geheel en al kragteloos is om ’n lewenswandel mee te bring wat God kan behaag. Daarom sê Paulus “hoe keer julle weer terug tot die swakke en armoedige eerste beginsels wat julle weer van voor af aan wil dien?” (Galasiërs 4:9b). Toe ek kommentaar gelewer het op Frik se uitlating dat die onderhouding van die Shabbat nie vir mense se redding is nie, maar ’n teken is van julle liefde vir God, is ek summier geblok. Hier’s my oorspronklike respons.

As die Shabbat ‘n teken is van jou liefde vir God en ek nie die Shabbat of die feeste soos julle vier nie, is dit ‘n teken dat ek God nie liefhet nie? Wat het Jesus gesê oor tekens? “’n Slegte en owerspelige geslag soek na ‘n teken, en geen teken sal aan hom gegee word nie, behalwe die teken van die profeet Jona.” (Matteus 12:19). Die Jode het baie tekens gehad waarop hulle staatgemaak het om hulle liefde vir God te bewys, o.a. die Shabbat en die feeste. Wat het God daarvan gedink? “Ek haat, Ek versmaad julle feeste en het geen welgevalle aan julle feestye nie.” (Amos 5:21). God sê eintlik hier, dit stink vir Hom. Wat beteken hierdie vers: “Want omdat hulle die geregtigheid van God nie ken nie en hulle eie geregtigheid probeer oprig, het hulle hul aan die geregtigheid van God nie onderwerp nie. Want Christus is die einde van die wet tot geregtigheid vir elkeen wat glo. ” (Romeine 10:3-4). As jy werklik in Christus glo, dan is Hy die vervulling en die einde van die wet vir jou, (insluitende die Shabbat en die feestye).

Paulus skryf, “Julle neem dae en maande en tye en jare waar. Ek vrees vir julle dat ek miskien tevergeefs aan julle gearbei het. (Galasiërs 4:10-11). Dit kom daarop neer dat enigeen wat die wet probeer onderhou, insluitende die Shabbat en die feestye, tevergeefs Paulus se sendbriewe lees, veral dan ook Galasiërs. G’n wonder julle beskuldig my van “ongoddelike saad” wanneer ek woord vir woord uit die Bybel vir julle aanhaal nie. Is dit werklik wat God se Woord vir julle beteken – “ongoddelike saad?”

Is julle miskien beter as die apostels Petrus en Paulus? Dink julle werklik Paulus sou dit durf waag om ’n gesalfde van God, naamlik Petrus, kragdadig in die openbaar, voor almal, te betig en tereg te wys terwyl hy geweet het dit is verbode om God se gesalfdes aan te raak en sy profete kwaad te berokken? Trouens, Paulus wat deeglik bewus was dat daar by God geen aanneming van die persoon is nie, het nie geskroom om Petrus voor stok te kry nie. By hom het dit nie gegaan oor die aansien van die persoon nie (Petrus was die hoof-apostel in Jerusalem), maar die suiwerheid van die Evangelie. Toe Paulus hom voor almal oor die vingers getik het, het Petrus hom nie opgeruk nie, en vir Paulus gesê, “Hei, ou mannetjie. Weet jy met wie hy praat? Jy’s nog nat agter die ore en jy waag dit om my, ’n gesalfde van God, so stief te behandel? En ja, wees ook gewaarsku, die Here gaan jou block, want Hy gaan nie hierdie tipe van ongoddelike saad toelaat nie.” Nee-nee, Petrus het radikaal anders a julle tweetjies hom in nederigheid aan Paulus se teregwysing onderwerp en hom deeglik van sy verkeerde weg bekeer. Wat was hierdie weg? Hoe beskryf Paulus die weg wat Petrus ingeslaan het? Kom ons kyk.

Maar toe Petrus in Antiochíë gekom het, het ek hom openlik teëgestaan, omdat hy veroordeeld gestaan het. Want voordat sommige van Jakobus af gekom het, was hy gewoond om saam met die heidene te eet; maar ná hulle koms het hy hom teruggetrek en hom eenkant gehou uit vrees vir die wat uit die besnydenis is. En saam met hom het ook die ander Jode geveins, sodat selfs Barnabas hom laat meevoer het deur hulle geveins. Maar toe ek sien dat hulle nie reguit loop volgens die waarheid van die evangelie nie, het ek vir Petrus in teenwoordigheid van almal gesê: As jy wat ‘n Jood is, soos ‘n heiden lewe en nie soos ‘n Jood nie, waarom dwing jy die heidene om soos Jode te lewe? (Galasiërs 2:11-14).

Die oomblik toe Petrus hom teruggewend het tot die wet, het hy nie meer reg geloop volgens die waarheid van die evangelie nie. Die gevolg was dat andere, selfs ook die apostel Barnabas, deur hom mislei is. En, presies net dit is gewoonlik die vrug wat ’n valse evangelie of ’n sogenaamde evangelie oplewer – dit verlei en mislei talle ander mense wat opkyk na hulle geestelike leiers vir geestelike leiding, en hulle bang maak met 1 Kronieke 16:22 en Psalm 105:15.

Niks is so gevaarlik soos ’n geestelike leier wat in ’n ander evangelie verval het nie. Niks is so handig en gebruiklik vir die Satan as ’n geestelike leier wat ’n ander evangelie, een wat soos die ware Jakob lyk en klink, verkondig nie. Hoe lyk hierdie valse evangelie waarteen Paulus so heftig gestry het? Kom ons kyk.

Paulus vergelyk hierdie “evangelie” met Hagar, Sara se Egiptiese slavin, met wie Abraham op versoek van Sara getrou het om vir hulle (Abraham en Sara) ’n nageslag te verseker. Soos julle weet is Ismael uit hierdie huwelik gebore. Paulus vergelyk Hagar ook met die berg Sinai waar Moses die Wet ontvang het.

Julle wat onder die wet wil wees, sê vir my, luister julle nie na die wet nie? Want daar is geskrywe dat Abraham twee seuns gehad het, een uit die slavin en een uit die vrye. Maar die een uit die slavin is gebore na die vlees, en die ander een uit die vrye deur die belofte. Dit is sinnebeelde, want dié vroue staan vir twee verbonde: een, van die berg Sinai afkomstig, wat vir die slawerny kinders baar—dit is Hagar; want Hagar staan vir die berg Sinai in Arabië en kom ooreen met die teenswoordige Jerusalem en is met haar kinders saam in slawerny.(Galasiërs 4:21-25).

Paulus vra met opperste verbasing, “Julle wat daarop aandring om julleself en ook ander mense onder die wet te plaas as teken dat julle God liefhet (die Shabbat en die feeste), weet julle dan nie wat die wet werklik sê nie? Die Amplified Bible sê dit so: “Tell me, you who are bent on being under the Law, do you not listen to [what] the Law [really says]?” Met ander woorde, “Is julle so blind dat julle nie weet wat die wet eintlik vir julle wil leer nie? Hoe kan julle weet as julle julself weer tot slawerny en dwingelandy onder die wet wil ingrawe?” Dan waarsku Paulus in hoofstuk 5 verse 1 en 4, “Staan dan vas in die vryheid waarmee Christus ons vrygemaak het, en laat julle nie weer onder die juk van diensbaarheid bring nie. Julle wat geregverdig wil wees deur die wet, is losgemaak van Christus; julle het van die genade verval.”

Paulus is nie besig om die leer dat ’n Christen sy of haar redding kan verloor nie. Wat hy wel tuisbring is dat wanneer iemand hom of haar terugwend tot die wet om God te behaag, ’n ruimte betree waar God se genade nie meer werksaam is nie. Daarom sê Paulus in Romeine 11:6, “En as dit deur genade is, dan is dit nie meer uit die werke nie; anders is die genade geen genade meer nie. En as dit uit die werke is, dan is dit nie meer genade nie; anders is die werk geen werk meer nie. (Romeine 11:6). Die Amplified sê dit so, “But if it is by grace [God’s unmerited favor], it is no longer on the basis of works, otherwise grace is no longer grace [it would not be a gift but a reward for works]. Paulus sê eintlik hier, As jy jouself onder die wet wil plaas, is jy aangewese op jouself en jou werke, en nie meer langer sy genade nie. Hoekom? “Maar wat sê die Skrif? “Werp die slavin en haar seun uit, want nooit mag die seun van die slavin saam met die seun van die vrye erwe nie. Daarom, broeders, ons is nie kinders van die slavin nie, maar van die vrye.” (Galasiërs 4:30-31). Waarom wil julle dan die vrye verruil vir slawerny en weer kinders word van die slavin as Jesus die einde van die wet is?

Want Christus is die einde van die wet tot geregtigheid vir elkeen wat glo. (Romeine 10:4)

Enigiemand wat nog steeds die wet wil onderhou (aka die Shabbat en die feeste) ontken inderwaarheid dat Christus die einde (vervulling) van die wet is en dus ook dat dit alleen geloof is wat tot geregtigheid lei. Ek herhaal wat ek voorheen gesê het: Julle is besig om derduisende mense te mislei en sal eendag verantwoording moet doen voor God.